የሆድ ድርቀት (constipation)

የሆድ ድርቀት የሚከሰተው ትልቁ አንጀት የተመገብነው ምግብ ብዙ ውሃ መጦ ሲያልቅ ነው፡፡ ይሁንና ድርቀትን የሚያመጡት የተለያዩ ምክንያቶች ናቸው፡፡ ለምሳሌ ያህል በፋይበር (አሰር) የበለጸጉ ምግቦችን ያለመመገብ፣ ዓይነ ምድር መጣሁ ሲል በወቅቱ አለመጸዳዳት፣ወተትና የወተት ተዋጾዎችን አዘውትሮ መመገብ፣እንቅስቃሴ አለማድረግ በተለይ በዕድሜ የገፉ ሰዎች፣እርግዝና እንዲሁም አንዳንድ እንደ ሳይኮትሮፒክ እና ናርኮቲክ ያሉ መድኃኒቶች ድርቀትን ሊመጡ ይችላሉ፡፡

የድርቀት ምልክቶች ከሆኑት ውስጥ የሆድ ሕመም፣የሆድ ጭብጠት፣የሆድ መንፋት፣ ማቅለሽለሽ እና የመግብ ፍላጎት ማጣት ናቸው፡፡ አብዛኛው ጤነኛ ሰው ቢያንስ በቀን አንድ ጊዜ አይነምድር ይወጣል፡፡ ዓይነ ምድር በውስጡ በቂ እርጥበት ያለው ከመሆኑም በላይ በሚወጣበት ጊዜ ያለአንዳች ስቃይ ነው፡፡ በሌላ በኩል ግን ለሁለትና ከዚያ በላይ ቀናት መቆየት ዓይነ ምድር ያለመውጣት ችግርን ያመለክታል፡፡

አንዳንድ ጊዜም የደረቀው ዓይነ ምድር ከታችኛው ትልቁ አንጀት ክፍል ተቀርቅሮ ለማስወጣት ስለሚያስቸግር በጣም ማማጥ ወይም መሰርሰር ባስ ሲልም አንጀትን መታጠብ አስፋላጊ ሊሆን ይችላል፡፡ በዙ ማማጥ ግን የኪንታሮት በሽታ ሊያመጣ ይችላል፡፡